Balantzearen Bilakaera

09.12.31ra arte, MONDRAGON Korporazioaren Balantzeak 33.334 milioi euroko baliabide administratuen bolumena metatu zuen, ekitaldi horretan bertan -165 milioi aldakuntza minimoa izan ondoren, hau da, %-0,5 portzentaje terminoetan.

Korporazioa osatzen duten hiru Arlo handietara jaitsita, ikus daiteke balantzea handitu duen bakarra Finantzen Arloa izan dela, izan ere, alor horretako aktiboak, baterakuntzako doiketen ondoren, 326 milioi euro aurreratu du, batez ere aktibo finantzarioen zorroan inbertsioak izandako hazkundeari esker.

09.12.31ra arte, MONDRAGONeko balantzeko partida bakoitzaren alderdirik aipagarrienak ondoren zehazten dira:

Aktibo Finkoa

2009ko itxieran erregistratutako ibilgetua 7.591 milioi eurora iritsi zen, urtean zehar 343 milioi euroko murrizketa garbia izan ondoren (%4,3).

Ekitaldian egindako inbertsioak, guztira, 378 milioi euroko izan dira; zifra hori aurreko ekitaldikoaren %29 baino ez da, eta horretan eragina izan du urte osoan ahalmen produktiboa oso gutxi erabili dela, izan ere, horrek inbertsio gehiago ez egiteko aholkatzen zuen, baita desinbertsio batzuk ere, Banaketa Arloan. Horrez gain, 2009an aplikatu diren amortizazioak 596 milioi eurorekin kuantifikatu dira, hau da, %0,8 suspertze txikia gertatu da aurreko urtearekin alderatuz gero..
 

Aktibo Zirkulatzailea

Aktibo zirkulatzailea dimentsiorik handiena duen ondare masa da (25.743 milioi euro), nahiz eta 2009an soilik 178 milioi euroko gehikuntza erregistratu den, hau da, %0,7ko gehikuntza termino erlatiboetan.

Arlo bakoitzean, partida honen bilakaera desberdina izan da, izan ere, Finantza eta Banaketa Arloetan 341 eta 130 milioiko euroko hazkundea izan den bitartean, hurrenez hurren, Industria Arloaren dimentsioak 294 milioi eurotan egin du atzera, eta jaitsiera handi samarrak izan ditu bai Izakinetan, bai saldo Hartzekodunetan. .

Ondare Garbia

Aurreko ekitaldiaren itxieran, MONDRAGONeko Ondare Garbia 4.284 milioi eurokoa zen, kanpo bazkideei zegokien zatia kontuan hartu barik, zeinak Fondo Propioak ere badiren, parte hartzen ari diren negozioetan. Aipatutako Ondare Garbitik, 2.255 milioi euro Kapital Sozialari zegokion eta gainerako 2.029 milioi euro, berriz, Erreserbei.

Urtean zehar, Ondare Garbia 23 milioi euro gehiagorekin handitu da. Zenbateko hori Emaitza kapitalizatuen eta saltzeko erabilgarri zeuden aktibo finantzarioen balorazio handiagoaren saldoa da, alde batetik, Finantzen Arloko inbertsio zorroko tresna finantzarioek beren balioaren zati bat berreskuratu dutelako eta, beste aldetik, Emaitza negatiboak izan dituzten negozioetan Erreserbak murriztu direlako.

Kanpo Bazkideak

Azken urteetan, MONDRAGON Korporazioak bateragarri egin ditu bere barne hazkundea eta enpresa berrien garapena beste bazkide batzuekin, hala merkatu nazionaleko zabalkundean nola nazioartekoetan.

Kanpo partaidetzon zenbateko osoa 189 milioi eurora iritsi zen 09.12.31ra arte, eta kopuru hori, batez ere, kooperatiba industrialetako eta banaketa sektoreko egoera orri bateratuetan integratuta zeuden sozietate partaidetuetan kokatuta zegoen..

Pasibo ez Korrontea

Kooperatibek eta beren sozietate partaidetuen finantzaketa saldoak, hirugarrenetatik datorrenak -urtebetetik gorako epemugarekin-, 3.431 milioi euroko zabalkundea izan du 2009an zehar (%40,9), eta ekitaldiaren itxieran 11.811 milioi eurora iritsi da.

Hazkunde horren zatirik handiena Finantzen Arloan aurkitzen da; bertan, bezeroen gordailuen atalean, epera jarritako aurrezkia nabarmen mugitu da urte batetik gorako epeetara, eta Banaketa Arloan ere kreditu entitateekin zegoen zorra berrantolatu egin da, epe laburretik epe luzera aldatuz.

Bilakaera horrek ekarri du MONDRAGON osoaren Maniobra Fondoa nabarmen hobetzea, 2008ko itxierarekin alderatuta 3.806 milioi eurorekin handitu baita, hau da, gaur egungo abagune ekonomiko zailari aurre egiteko egoera lasaian dagoela esan daiteke.

Pasibo Korrontea

Balantzearen partida honek 3.628 milioi euroko murrizketa izan du 2009an, hau da, %17,5 termino erlatiboetan, eta murrizketa hori Korporazioaren Arlo guztietara hedatu da..

Finantzen Arloan, epe luzerako figuren zabalkundeak ekarri du epe laburragoetara egindako ezarpenak eta ageriko aurrezkiak murriztea eta, ondorioz, partida hau 1.322 milioi euro uzkurtu da.

Aipagarria da, halaber, Banaketa Arloko epe laburrerako hartzekodunen murrizketa, 1.920 milioi eurorekin, lehen aipatu den finantza zorraren berrantolamenduaren ondorioz; Industria Arloan, berriz, pasibo korrontearen murrizketa 360 milioi euro izan da.