Lehendakariaren Mezua

2010eko ekitaldia, MONDRAGONerako, ona izan dela esan dezakegu. Korporazioan sartuta dauden enpresek ahalegin handiak egin dituzte, eta ahalegin horiei esker iazkoak baino emaitza global hobeak lortu dira.

Dudarik gabe, bilakaera positibo hori, neurri handi batean, 2009an abian jarritako jarraibide eta jarduketa ildoei esker izan da posible, hain zuzen ere finantza, ekonomi eta enpresa alorrean kooperatibetan hedatu eta 2010ean fruitua eman duten hainbat neurriri esker. Neurri horiekin asmatu izanak eta kooperatibek nazioarteko merkatuetan izan duten presentzia handiagoak eta berrikuntzaren alde egindako apustu sendoak gure negozioen lehiarako gaitasuna hobetzea ekarri dute, bai eta 2010aren bukaeran guztirako salmentak hobeak izatea eta MONDRAGONeko emaitzak nabarmen handitzea ere.

Korporazioa osatzen duten arloen bilakaerari dagokionez, esan behar da Finantzetan, sektorerako eszenatokia zaila izanda ere, MONDRAGONeko erakundeek ondo gainditu dutela ekitaldia beraien negozioen efizientzia hobetzeko neurriak hartuta; Banaketa arloan, ekitaldian kontsumoa apala izan bada ere, urrats esanguratsuak egin dira bankuekiko zorra murrizteko bidean, barne efizientzia hobetzeaz aparte, eta bezeroentzako "prezio lehiakorrenean" oinarritutako estrategia baten alde egin da; Ezagutzaren alorrean, aurrera egin da MONDRAGON Health proiektua sendotze lanetan eta enpresa proiektu berriak bultzatzeko lankidetzako plataformak eratze lanetan, eta, bukatzeko, industria alorrean, nazioarteko merkatuetan presentzia handiagoa izan dugu eta horri esker jarduera hobetu eta industriako enplegua sortu ahal izan da. Ildo horretan, azpimarratzekoa da nazioarteko salmentek % 13,3 gora egin dutela iazko ekitaldiarekin alderatuta, guztiarekiko % 63 izatera helduta eta gure presentzia komertziala sendotuta Europako merkatuetan eta azaleratzen hasi diren Brasil, Txina, Errusia eta India moduko herrialdeetan.

Eta joera horrekin jarraituko da datozen urteetan: MONDRAGONen nazioarteko osagaia sendotzeko apustu sendoa egiten jarraituko da, epe luzera iraunkorrak diren enpresa proiektuak garatzeko ezinbesteko baldintza gisa.

Bai eta berrikuntzaren aldeko apustuarekin ere, zeina korporazioaren identitate ezaugarria eta korporazioaren garapenaren ardatza baita. 2010ean apustu hori sendotu egin da bitarteko garrantzitsuak eta pertsona asko horretara bideratuta. Informazioaren eta ezagutzaren gizartean eta abiada bizian eraldatzen ari den mundu global batean bete-betean sartuta gaudela, berrikuntzarekin eta ezagutzarekin lotutako agenteek protagonista izaten jarraitzen dute enpresa proiektuen bilakaeran. Mondragon Unibertsitatea, zentro teknologikoen sarea eta kooperatiben I+G unitateek aparteko esfortzua egingo dute MONDRAGONen jarrera berritzailea egiaztatzeko etorkizunerako bermerik hoberena delakoan.

Eta hori guztia eredu kooperatiboaren baitan, Printzipioak, Balioak eta Gestio Eredua partekatuta, eta taldearen indarrean uste sendoa izanda, hazten jarraitzeko eta korporazioak aberastasunaren eta enplegua sortzearekin duen konpromisoa egia bihurtzeko.