MONDRAGONek nazioartekotzean sakondu zuen; urte honetan ere nazioartean gauzatutako salmentek eragin zuten industria arloan. Ekainean, Oronak bere instalazio berriak eraikitzeari ekin zion. Galarretan, Hernaniko sarreran eraikiko den Orona Ideo Innovation City gunean bat egingo dute eta elkarrekin garatuko dira enpresa, unibertsitate eta ikerketa jarduerak.
Irailaren 28an MONDRAGONen XI. Kongresuak –650 lagunez osatua–, aho batez onartu zuen 2013-2016 Politika Sozioenpresariala. Plan horretan, honako xede hau jarri dio Korporazioak bere buruari: gure enpresa sarea eraldatzea, balio erantsiko enplegua sortzeko, kooperatiba alorrekoa. Erronkak aldaketa sakonak eskatuko ditu, negozioen dimentsioa merkatu globalera egokitzea, gorabidean dauden merkatuetara orientatzea, aliantza estrategikoen garapen posiblea, hazteko aukera gutxien duten jarduerak birbideratzea, eta irmotasunez proiektu integral korporatiboak garatzearen alde egitea.
